السلام عليكم ورحمة الله وبركاته
آه يابلد فيكي حكام مبيحرموش ظلم وفساد , آه يابلد فيكي شعب حب الشقي والتعب والذل , آه يابلد يالي لقمة العيش فيكي بقيت مستحيلة , آه يابلد يالي ارضك اتباعت حتة حتة واحنا ساكتين , آه يابلد يالي هواك دلوقتي بقي معرووض للبيع , آه يابلد يالي اصبحت فيكي روبي ونانسي قدوة بناتك , آه يابلد يالي بقي عمرو دياب قدوة شبابك , آه وآه و آه يابلادي .
في البداية انا فعلا اسف جدا اني بقالي كتير مكتبتش حاجة يمكن عشان الوقت مش متاحة للكتابة او يمكن اني مش فاضي
البوست بتاع النهاردة بصراحة بكتبه من جوه قلبي هو مش مرتبط بموضوع معين لأن الي في دماغي مواضيع كتير حتكلم بإيجاز عنها.
بس انا حبيت احطله عنوان وهو آه يابلادي
اول حاجه حكتب عنها كليتي وبما اني بكالريوس السنة ديه فانا بقالي خمس سنين في الكلية لغاية اما حنفجر الاسبوع الي فات عملت إدارة الكليات انتخابات وطبعا زي كل سنة كوسة واسطة للصبح ومن غير حد ما يعرف , الواحد بصراحة بيشيط اما يشوف ظلم قدام عينه ويفضل ساكت عملنا زي كل سنة ما بنعمل وبرضه الظلم بيطغي وبيكبر عارفين ليه
لاننا احنا بس الي بنتحرك انما بقيت الناس جبانة وخايفة مش عارف ليه مع انهم عارفين انهم في النهاية كده كده حيتظلموا ما هي اصلها بفيت اصل في حياتنا.
علي العموم فكرنا في حاجة كويسة اننا نعمل قايمة سوداء ونوزعها ونعلقها في الكلية وطلعت اعلنت عنها وتخيله ايه الي حصل
الطلاب الغلابة الي اتكتب اسمهم سد خانة عشان يكملوا العدد طلعولي كلهم بيقولوي متكتبش اسمينا احنا مالناش ذنب بس اسمحهولي اصرخ واقول : مين الي ليه ذنب في البلد ديه من الي خلي ناس زي الظلمه دول يفتروا علينا ؟؟
والسؤال ده انا بطرحوا للناس كلها وياريت حد يجاوبني عليه ؟
تاني حاجة حكلم فيها ملتقي يالا نفضحهم
فضل من الله اني كنت من فريق العمل بتاعه
بصراحة تعبنه جدا وانا بتقدم بخالص الشكر وبقول لكل اعضاء الفريق جزاكم الله خيرا وتقبل الله منا ومنكم
مع انه حصل بعض الأخطاء ولو في حد زعل منها ياريت ميزعلش لازم كده في البداية لازم يكون في أخطاء .
بصراحة الواحد فرح جدا اما شاف جموع المدونين الي حضروا حسيت بعزة وفعلا كنت عايز اقوم ونادي : يا خلق ياهو يا ايها الظالمون مصر لسه بخير اولاد مصر لسه بيحبوها .
كنت عايز اقولها بعلو صوتي وانا فعلا قولتها لما المدونين طلعوا اتكلموا حسيت فعلا اني انا الي بتكلم كل حرف اتقال في الملتقي حسيت انه طالع من جوايا انا مش من الي بيتكلم بس انا ليه طلب عندكم :
ياريت ياريت نفضل نحبها علي طول ......!
ثالث حاجة حكلمكم فيها هو بيع اسم مدينة الأقصر
انا بصراحة مش عارف الخبر صحيح ولا لا
بس بيني وبينكم انا اتفجعت لسبب انا سألت سؤال:
انا من الإسكندرية لو في مرة سفرت وسمعت ان هما باعوا اسم الاسكندرية وجيت قطعت تذكرة عشان ارجع حرجع علي فين ؟؟؟ مش عارف حرجع علي بلدي ولا حرجع علي بلد تانية وبيت تاني .
يعني حسبتها قلت لنفسي ماهو كده ممكن حد يجي يبيع بيتي الي انا قاعد فيه ده بالعكس ممكن يبيع اسمي واسم ابويه واسم جدي
وحبقي مين سعتها حبقي شخصية مجهولة بلا اسم ولا عنوان
فعلا تخطيط كبير لمحو هوية شعبنا و هوية اسلامنا
ربنا فعلا يكون في عونا مش عارف حنلاقيها من إلي جوه ولا من اللي بره
بصراحة من كتر الي الواحد بيشوفه وبيسمعه حاسس بكبت فظيع حاسس انه حييجي عليا يوم وانفجر
عشان كده قلت انفجر احسن علي المدونة وقول بعلو صوتي
آه آه آه آه يابلد
