Saturday, November 22, 2008

مدونين لنصرة غزة

دعوة لصيام يومي الأثنين 24/11 - 1/12 والدعاء لإخواننا في غزة والتبرع بثمن وجبة الافطار لأهالينا في غزة
والي عايز يشارك يسجل معانا في حملتنا بوضع البانر في مدونته والمشاركة في الجروب ويدعو الناس كلها للمشاركة معانا
هدفنا 1.000.000 مسلم يدعو ويتبرع لاخواننا الرقم سهل ونقدر نحققه بس عايز تعاون وجدية
والي ميقدرش يصوم يوم يصوم التاني بس لازم نصوم من اجل اخواننا في غزة

البانر علي المدونة


http://www.facebook.com/group.php?gid=37720052122

Tuesday, November 11, 2008

رايحة لفين يا بلادي


كان ياما كان ياسعد ياكرام كان فيه بطة ساحبها عيالها وراها وماشية في وسط الشارع وكل دقيقة واحد من عيلها بيداس .... حكايتنا حكاية بلد حالها بيتغيير للأسوء مش للأحسن وطبعا زي ما حضراتكم عارفين هي مصرنا الحبيبة زمان اما كنا صغيرين كان الواحد بياخد مصروف ربع جنيه كان بيبقي سعيد ومبسوط كان ساعتها بيعمل حاجه يعني يجبلك حاجه ساقعة مثلا .. حد يعرف الحاجه الساقعة بقيت بكام دلوقت .... مش عارف البلد ديه ناوية تروح علي فين ..... الازمة المالية العالمية نزلت الأسعار في جميع دول العالم إلا في بلدنا (رايحة فين يابلادي ) .... ده طبعا غير ارتفاع اسعار الشقق مع انخفاض اسعار الحديد (ده بعد ما تكرم علينا القيادي العظيم المبجل أحمد عز بتخفضها مراعاة لظروف الشعب ربنا يديله علي قد نيته ) ... ده طبعا غير طوابير العيش وطوابير الجمعية وطوابيرالظلم وطوابير امن الدولة مش عارف الشعب كله دلوقتي بقي خطر علي أمن الدولة ... الغريبة ان الناس وشعب مصر مش راحم نفسه شغال طحن في بعضه واستغلال وجشع مش حتي يرحموا بعض عشان ربنا يرحمهم لا بقت قاعدة في مصر أي حاجه تغلي عمرها مترخص تاني زي بالظبط القاعدة بتاعت إن مصر ليس لها رئيس سابق كل رؤساءها رؤساء راحلين عقبال الي في بالي يارب.......المهم عايزين نغير طريق البلد ديه عايزين نقولها تروح علي فين بالظبط مستني اقتراحتكم نشوف حنعمل ايه )

Saturday, March 8, 2008

انا خطبت يا جدعان وعقبال عندكم

السلام عليكم ورحمة الله وبركاته
اخيرا وبعد طول عناء ومشقة وبحث ( وهدت حيل ) أخيرا خطبت
ايوه علي فكرة خطبت يعني خطوبة مش خطبة الجمعة
بعد مدة من البحث دامت خمسة شهور متصلة اخيرا لقيت نصي الحلو
الحمد لله علي فكرة ديه نعمة عظيمة جدا انك تلاقي الإنسانة الي حتكمل معاك بقيت حياتك قولوا بس ما شاء الله ( خمسه وخميسه ) فعلا نعمة كبيرة انك تلاقي الي حتبني معاك حياتك ومستقبل وأسرتك
احكيلكم القصة من أولها ولا يلاش
بس لازم احكي

المهم يا جماعة انا اقعدت ادور وادور وادور لغاية اما نفسي اتقطع
المهم جالي اخ ورشحلي خطبتي الحالية المهم
صليت صلاة استخارة ولقيت نفسي وقلبي مستريح جدا ومطمئن
المهم قررت إني أشو
فها ( طبعا من غير هي ما تعرف ) شفتها ازاي بقي
شفتها في فرح

المهم اخدت ميعاد من الحاج طبعا
وجاء الموعد المنتظر اخدت الأخ الي كلمتكم عليه في الأول
واحنا رايحين قلتله بعد إذ
نك يا أستاذ فلان انت الي حتتكلم قالي ماشي واعتمدت عليه
المهم واحنا رايحين اذان العشاء أذن المهم رحنا صلينا كان اخوها هو الإمام
اول اما دخلت بصراحة عرفته وحسيت انه اخوها
كانت بشريت خير
المهم بعد اما خلصنا صلاة طلعنا بره لقيت اخوها التاني
طلع اننا نعرف بعض من قبل كده واتعرفت عليه كام مره
قلت بشريت خير تانيه
المهم رحت البيت وقبلت والدها هو بصراحة طيب جدا وانا حبيته جدا جدا من أول مره
و
برده اكتشفت اني شوفته قبل كده
جالي مره الشغل واتكلم معايا شوف النصيب ...
المهم فضلت مستني الأخ يتكلم متكلمش فضل ساكت بصراحة كان حيجنني المهم اتكلمت انا وأمري لله
كنت ساعتها خايف جدا بس شوية ولقيت نفسي بتكلم بس طبعا وش احمر واخضر وجاب ألوان أول مره يحصلي حاجه زي كده
المهم خلص اللقاء علي خير
وجالي الرد بالموافقة
اخدت بعضي واخدت الحاج والحاجة وجري علي بيتها
واتفقنا خلاص الحمد لله
وكانت الخطوبة يوم الجمعة الي فاتت 3/7 وبصراحة كان يوم جميل جدا
عمري ما حنساه مش حقدر اقولكم عليه لانه حاجه خاصة بيه انا بس بس اقدر اقول انه يوم كان ملئ بطاعة الله والمحبة والود والتئالف بين العائلتين الحمد لله فضل من الله سبحانه وتعالي عليا
انه رزقني بالإنسانة الي إن شاء الله تكمل معايا المشوار
ويارب يدوم علينا الود والمحبة والألفة
ويصبرها عليا ....
وعقبال عندكم يارب كلكم ان شاء الله
واهدلها بوكيه الورد ده

Tuesday, February 19, 2008

صوووووووووووووووووويت


السلام عليكم ورحمة الله

طبعا انتم مستغربين من عنوان البوست ده , بصراحة الواحد نفسه يعملها نفسي اطلع علي جبل عالي وصوت بأعلي صوت وأقول .....

ارحمنا يارب

اعفو عنا

ارحمنا من هؤلاء الظلمة

يارب انصر الإسلام

كفايانا ظلم وهوان وطغيان

خلاص يارب فاض بنا الكيل

يارب الأمة الإسلامية بتهاجم من قبل أعدائك

فلسطين وافغانستان

كوسوفا و الشيشان

العراق و السودان

ده غير الحكام الظالمين الي بيحكموا بقيت الدول الإسلامية

اصبح عد الدول الإسلامية الي فيها مشاكل صعب من كتر عددها

بس بعد كده بفتكر الأية ( إن الله لا يغير ما بقوم حتي يغيروا ما بأنفسهم ) فعلا احنا السبب سكوتنا علي الي بيحصل هو السبب 17 دولة اوربية اساءت للنبي صلي الله عليه وسلم وسكتنا مش قصدي عمل مظاهرات وخروج في الشارع بس لا التزامنا كمان بسنة نبينا اصبح غائبا ,

سكتنا .... سكتنا علي احالة العديد من شرفاء البلد الي محاكم عسكرية ورضينا بهذا الظلم ولم يتحرك ساكن من الشعب

سكتنا ... سكتنا علي اعتقال الكثير من برده شرفاء البلد وكأنهم هم الحراميه عجيبة

سكتنا .... سكتنا علي حصار غزة وما يحدث فيها وكأنهم قوم لا نعرفهم حتي لم تراعي حقوق الدولة الشقيقة

سكتنا ... سكتنا علي ما تريد وما تفعله الدول الأوروبية في كوسوفا وفي المسلمين هناك

بصراحة السكوت طول ولازم له من نهاية ويمكن مبشرات النهاية بدأت تظهر في أجواء الأمة الإسلامية واكيد احنا الي حنضحك في النهاية لانها دعوة الله ودعوة الله لا تهزم بس هل احنا حنكون الجيل ده ولا حنموت في عصر الذل والهوان ؟؟؟؟؟؟

Wednesday, February 6, 2008

عذرا ولكن



السلام عليكم ورحمة الله وبركاته


زملاء الأحباء بداية احب ان اعتذر عن انقطاعي هذه الفترة عن التدوين , ولكنه كان خارج عن إرادتي فاعذورني ,


في الأيام القليلة الماضية حدث الكثير من الأحداث المهمة بداية من حصار غزة واعتقال المعتقلين ولا نهاية بعد ذلك


ولكني فضلت بدلا من كتاباتي او طرقعتي علي الكيبورد اني اعمل وابذل قصار جهدي لمحاربة تلك الأحداث .


فحصار غزة لم يكن حصار للقطاع أو أهله ولكنه كان حصار لنا .


نعم كان حصار لكل عربي حصار لكل مسلم ومازال حصار يطبق علي رقابنا حتي يتم تحريره


ولذلك قررت ان احاول جاهدا لفك هذا الطوق عن رقبتي , قررت ان اعمل جاهدا لمعاونة إخواننا في غزة , وكما يعلم بعضكم أني أعمل في اتحاد الأطباء العرب فرع الإسكندرية مسئولا للملف الطبي فلقد قررنا في الاتحاد عمل القوافل الإغاثية لمعاونة إخواننا في غزة


ولذلك اخواني واخواتي ادعوكم للمشاركة معنا في فك الحصار عن غوة بالمعونات من أطعمه جافة , ملابس , بطاطين , اكفان , أدوية فهم في حاجة الي تبرعاتكم


لقد كتبت هذا البوست لأدعوكم للمشاركة في القافلة الرابعة التي ستخرج الي غزة في أقرب فرصة


ونحن في انتظار تبرعاتكم المالية علي حساب رقم


بنك فيصل الإسلامي 134900 ,


ومن يريد التبرع من جميع انحاء الجمهورية من المدونين الاتصال بهذا الرقم


0105076750


Sunday, December 2, 2007

تاج تاني مرة

لومكنتش مصري بس عربي
كانت هتبقى إيه نظرتك للمصريين واللي بيحصل في مصر دلوقتي؟
بصراحة .... انا متصورش إني حكون غير مصري
وبعدين لو افترضنا كده الي بيحصل في الدول العربية واحد مافيش فرق كبير
لوكنت أوروبي أو غير مسلم
بردو إيه نظرتك للعرب والمسلمين؟
كنت بقيت مسلم الكلام ده لو انا في عصر تاني غير دلوقتي مثلا في عصر الخلافة اين كانت
لكن في عصرنا الحالي احمد ربنا اني مش مسلم
من الي بيعمله المسلمين
ولكن احتمال ابقي مسلم لما اراه من الظلم الذي يقع علي المسلمين وصبرهم علي تحمله
لوقالولك إنت بقيت رئيس جمهورية هتعمل إيه؟
حرفضها طبعا
بس لو كانت إلزامية حدعي ربنا أنه يوفقني فيها ويعني عليها
لوكان ينفع ترجع طفل تاني وتخليك طفل علطول هترجع؟ وليه؟
حرجع لان الطفل لا يحاسب ويدخل الجنة
لوإنت طبيب وعندك مريض ميؤوس من حالته
أيهما تفضل
إنك تصارحه بالوضع وتقوله كل شيء بأمر الله في الاخرولا تغرس فيه الامل
لغاية لما يموت؟
الأولي مع التانية
حقوله ان الأمل في الله في يديه ملكوت السموات والأرض هو القادر علي أن يشفيك فعليك بطاعته
لوسمح لك برؤية الرسول عليه الصلاة والسلاموإنك تقوله كلمة واحدة بس
أو جملة واحدة بس
هتكون إيه؟
إني أحبك في الله
لوخطبت واحدة أو اتخطبتي لواحد
وأثناء الخطبة اكتشفت أو اكتشفتي إن الطرف الآخرغير قادر على الإنجاب
هيكون تصرفك إيه؟
اولا: حكمل الخطبة عادي جدا والزواج
ثانيا :حتزوج بأخري لكي انجب
لوطلعت القمرهتكتب إيه عليه؟
حكتب عليه حروف من نور وهي: (لله ما في السموات وما في الأرض)
لوكنا في عصر ازدهار الأندلس
كنت تتخيل نفسك إزاي؟
كنت اتخيل نفسي محمد الفاتح
لوأنا مررت التاج ده لحد وما جاوبش عليهأعمل فيه إيه؟
هو حر عايز يجاوب عليه يجاوب
مش عايز براحته
حمرر التاج :
لإسلام رفاعي
ومحمد عطية
ومحمد عصفور
وابوحنين السكندري
ولكل واحد حيشرفني بالتعليق

Sunday, November 11, 2007

تاج جديد



قالوا لك اختار عصر من عصور مصر علشان تعيش فيه تختار أى عصر وفى عهد أى حاكم .. واشمعنى ؟
العصر الي انا فيه لان ربنا سبحانه وتعالي خلقني فيه مسلم الله اعلم لو عشت في عصر تاني حكون ايه غير كده ربنا خلقنا في العصر ده عشان نغيير فيه وننشر دعوته

أول أولوية فى حياتك عيلتك ولا شغلك ولا اصحابك؟
ولا واحدة فيهم اولويتي هي دعوتي وبعدين أهلي ونفسي واصحابي
ايه أكتر حاجة بتحبها فى رمضان ؟
صلاة التهجد

اوصف أجمل فطار ممكن تفطره؟
اجمل فطار اما يكون كل احبابي معايا وقعدين في الجنة بنشرب من نهر الريان
لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل ؟؟
الله اعلم ولكني اتمني من الله سبحانه وتعالي اني اذا حكمت في افراد ان احكم بالعدل

وحعرف من المحكومين هما الي بيقيموا الحاكم ويوجهوه
مين أكتر اعلامى مصرى بتحترمه ؟
كل اعلامي شريف انا بحترمه كل اعلامي بيعمل لفضح الظلم والفساد
لو ممكن تشتغل شغلانة تانية كنت تتمنى تبقى ايه ؟؟

اكون قائد جيوش المسلمين
ايه تانى بلد تتمنى تعيش فيها بعد مصر ؟؟
مصر لاني مش متخيل اعيش في بلد تانيه غيرها
اوصف ترتيبات اجمل فرح ممكن تحضره ؟
اجمل فرح ممكن احضره فرح عروسة فلسطينية تزف في يوم استقلال القدس وفلسطين

حتي لو كان من غير فرق افراح ولكن كفاية الفرحة الي حتكون موجودة
بتراعى كلام الناس والقيل والقال ؟؟ ولو اه او لا قول ليه ؟
انا يهمني كلام الناس ولكني لا اراعيه

يعني انا مبعملش حاجة عشان يقولوا هاني عمل

ولكن كلام الناس في بعض الاحيان بيكون مفيد للفرد في اصلاح نفسه وعيوبه
السعادة هى ..؟
السعادة هي الرضا في كل الاشياء..... رضا الله.........رضا الوالدين .......رضا النفس ..........رضا الزوجة .......رضا الاخوة .....رضا الأبناء


عندك أمل ؟ اسبابك ؟
بالطبع

لان الله سبحانه وتعالي هو وحده في يديه مقاييس تغيير الأمور

ومن ليس له امل انسان بلاهوية

لما بتحب تهرب من كل شئ بتروح فين ؟؟
مبرحش في حته

لاني مبحاولش اهرب احب اواجه مشاكلي بشجاعة
امتى اول مرة خدت فيها نفس طويل وقلت ياااه انا فعلا كبرت ؟؟
اول اما تحملت مسئولية نفسي

وخصوصا اول اما دخلت جامعة لاني كنت في اسيوط
بتشرب سجاير ؟؟ وايه شعورك اما ست او راجل بيشرب سجاير ؟ ليه ؟
لا الحمد لله
ربنا يهديهم
بتعرف ايدك اليمين من الشمال ازاى ؟؟
هما عارفين بعض
ايه اكتر الة موسيقية بتحبها ؟
مفيش
فى رأيك ليه الذوق والنخوة اتعدموا ؟
عشان اسلامنا اصبح غريبا

ايه الحاجة اللى لو حصلت لك حتبقى سعيد اوى ؟
اني اخلف ولد وبنت يعرفوا ربنا كويس
تحب يبقى عندك ارض زراعية ولااجنس عربيات ولاكام عمارة ولافلوس فى البنك ؟
ولا واحدة في دول

احب يكون عندي مستشفي خيرية

البحر ولا النيل ؟
النيل لانه شفاف

اما البحر فهو غويط مالهوش اخر
مركب ولا طيارة ؟
طيارة

لان الطموح لازم يكون عالي
مجنون ولا عاقل ؟
عاقل
تقرا كتاب ولا تتفرج على فيلم ؟
اتفرج علي فيلم بس يكون فيلم هادف يحمل معاني طيبة اسلامية وده مش موجود حاليا فالجأ للقراءة
تمرر التاج ده لمين ؟

لكل مدون حيعلق علي التاج